Llenwi munud fach

Roedd yn RHAID i mi flogio heno! Naill ai blogio neu tynnu fy ymenydd allan, ei roi mewn tanc pysgod am 'chydig a gwylio dyrnaid o 'has beens' neu efallai 'never weres' yn ponsian o gwmpas mewn coedwig yn Awstralia, rhyw hanner milltir o westy 5 seren, yn cwyno eu bod yn llwgu ar ol tridiau! Mae'n ddigon i foi gychwyn ymgyrch i gael dechrau hela eto.

Oes ma' 'jungle fever' yn ty ni.

Un peth da am y teledu mae'n siwr ydy eich bod yn medru troi y damn thing i ffwrdd, neu fynd i ystafell arall i ddarllen neu i falu cachu ar flog.

Do, dwi 'di cal llond bol o deledu. Dyna pam brynais i dy newydd efo shed anferth, ond ma'r blydi golau yn y sied angen ei drwsio a ma' hi rhy blydi oer i fynd yno beth bynnag, felly sori bois 'da chi'n mynd i orfod fy nioddef yn blogio.

Be sy'n bod ar bobl dwedwch? Am faint mwy 'da ni'n mynd i orfod dioddef pobl yn eistedd mewn ty yn siarad lol, gwylio pobl sy'n methu canu yn ceisio profi eu bod yn ser pop, gwylio celebs a dwy droed chwith yn ceisio bod yn Fred a Ginger neu fel heno, gwylio pobl sy'n 'llwgu' yn gwrthod bwyta danteithion y jungle? Ma hi di mynd yn wirion bost. Does dim posib cael hyd i blisman y dyddiau yma 'chos ma' nhw i gyd yn Sunhill, ma' pob ambiwlans yn Holby, yr unig beth sy'n ffit i'w fwyta yw be' bynnag ma'r Chef Noeth neu'r Arch Regwr yn ei gynnig o gegin uffern a fedrwch chi ddim fforddio ty yn Sir Benfro 'chos ma' "A life in the country" 'di perswadio llwyth o Gockneys i symud yno. Yn y bath dwi angen sebon hefyd bois, dim ar y blydi teledu!

Yn waeth na hynny, pan 'da chi 'di llwyddo osgoi'r holl rwtch yma dim ond dau beth sydd ar ol:

Blydi fwtbol!

a diolch i Dduw - Top Gear!

Adeiladu ysgol am bris dau beint? Mae o'n bosib, dim ond i chi feddwl 'r un fath a fi!

Sawl peint o laeth mwnci, cherry binks bach neu botel o Chateau Cardboard gewch chi'r 'Dolig yma?

Os 'da chi unrhyw beth fel fi, mi fydd yn ambell i un ma' siwr!

Am be' ddiawl 'dwi'n son?

Wel neithiwr yr oeddwn yn eistedd o flaen y bocs (dyna pam nes i ddim blogio wir i chi!) ac fe welais hysbyseb Oxfam Unwrapped yn ystod y ddau funud yr oeddwn ar ddihun. Rhaid cyfaddef i'r hysbyseb yma ddal fy nychymyg yn syth, a ma' toiled yn Affrica rwan ar dop y lythyr sy'n mynd at Sion Corn yr wythnos nesa'.

Ond wrth bendroni tra'n yfed botel bach reit neis o Rioja cefais syniad. 'Sgwn i, meddyliais, fedra i ddefnyddio'r tipyn blog yma a falla Facebook a My-Space i wneud rhywbeth mawr hefo 'chydig bach?

Felly off a fi rownd gwefan Oxfam Unwrapped i weld oedd yna rywbeth y gallen ni gyd ei brynu, am bris peint neu ddau, y byddai'n gwneud gwahaniaeth uffernol y 'Dolig yma. A wyddoch chi mae na lwyth o bethau, ond yr un a ddaliodd fy sylw oedd bod posib prynu 'darn o ystafell ddosbarth am £5 (pris 2 beint yn y rhan fwyaf o lefydd dwi'n mynd iddyn nhw beth bynnag).

Rwan ma dosbarth cyfan yn costio £1,700, sy'n golygu os wnaiff 340 o bobl brynu darn bach o ddosbarth yn lle'r ddau ddiod olaf 'na yn y parti 'Dolig, mi fyddai posib cael dosbarth cyfan yn eithaf rhwydd.

A dyna'n syml y sialens.

'Rwan dwi'n sylweddoli fod agor a cau ysgolion yn bwnc eithaf llosg yng Nghymru ar hyn o bryd, ond gadewch i ni fod yn onest am funud. Fydd yna'r un plentyn yng Nghymru heb le mewn ysgol y flwyddyn nesa'. Mi fydd pob un yn cael addysg gyflawn o safon uchel gan athrawon gweithgar a brwdfrydig.

Felly be' am i ni fod yn 'chydig llai plwyfol a chynnig yr un cyfle i blant mewn gwledydd sydd ag anghenion lawer iawn yn fwy na'n rhai ni. Anghenion mor fawr nad oes posib i ni yng Nghymru eu deall.

A 'da ni'n mynd i fedru gwneud hynny heb hyd yn oed meddwl amdano fo. Rargian 'dwi 'di colli £5 cyn heddiw tra'n llymeitian mewn rhyw dafarn neu gilydd!

Felly peidiwch prynu peint i mi y 'Dolig yma, prynwch ystafell ddosbarth i blant fydd yn ei gofio am weddill eu hoes.

Yn amlwg fe gewch chi wneud hyn yn gwbl ddi-enw, ond mi fydda hi'n braf iawn cael clywed gennych os 'da chi'n bwriadu fy nghefnogi.

Dwi di gosod gwe-gyfeiriad syml i fyny wnaiff fynd a chi yn syth i'r dudalen gywir heb gofnodi eich defnydd ohonno a dyma fo:

http://www.build-a-school.net.tf/

Ond fel o'n i'n deud 'sa hi'n braf iawn cael gwybod faint o gefnogaeth sydd i'r ymgyrch.

Jest meddyliwch amdano y tro nesa' 'da chi'n prynu rownd £15!

Rargian, diwrnod arall o fethiant! Dwi'n dechrau gwylltio hefo fi fy
hun rwan ac yn amau nag ydw i'n gwneud digon o ymdrech. Ymdrech myn
diawl! Triwch chi flogio o ffôn lôn! Wedi cal llond bol a ma' hwn 'di
cymryd 10 munud i'w deipio - dwi'n dda i ddim ar decstio! Digon!

Dwi'n teimlo braidd yn euog i fod yn onest fy mod wedi esgeuluso'r blogio 'ma ers tro bellach - a ma' rhaid cyfaddef fy mod wedi dechrau mwynhau fy hun yn myfyrio a malu yma. Ond, fe ddaeth un peth ar ol y llall a ma'r hen flog wedi cael ei adael i'w ddyfeisiadau ei hun.

Does dim dwywaith fy mod wedi cysidro paldaruo fwy nag unwaith, ond roedd yr hen anghenfil dal mewn bocs (dyna'r blydi bocsys 'na eto) a hyd yn oed pan ges i gyw anghenfil ar fy nglin roedd 'na ryw rwystredigaeth yn codi a diffyg ysbrydoliaeth o unrhyw fath. Rhaid dweud fod Ysgol Sul B&Q wedi troi yn ysgol ddyddiol bellach ac mae'r ardd newydd a digon o waith i'm cadw'n brysur am oes.

Er y prysurdeb dwi'n meddwl mai diffyg ysbrydoliaeth yw'r prif fai er hynny. Ma' 'na ddigon yn digwydd bob dydd sy'n fy nghorddi fi'n rhacs cofiwch, ac mi fydda i'n meddwl reit aml y dylwn fod yn chwydu fy llid yn erbyn y byd a'i betws yma - yr hen gatharsis 'llu. Ond erbyn cyrraedd adref a gwneud rhyw jobyn neu ddau o gwmpas y lle, dwi'n ffeindio fod y llid a'r dicter sydd wedi bod yn berwi drwy'r dydd yn gadael, a ma' bywyd yn eithaf dedwydd a thawel yn fy nghornel bach newydd i o Gymru fach.

Ma' hynny wedi i gwneud i mi gysidro bod ffordd felly o ehangu'r dedwyddwch newydd 'ma i weddill fy niwrnod. Meddwl oeddwn i y baswn i'n trosglwyddo catharsis y tipyn blog yma o ddiwedd dydd (fel yr oedd yn tueddu i fod o'r blaen) i fod yn ryddhad yn ystod y dydd. Fe ddaw hynny a'i drafferthion ei hun wrth gwrs. Wel fedra i ddim gwario gormod o amser yn blogio yn ystod diwrnod gwaith na fedra, dim Aelod Cynulliad ydw i wedi'r cwbl!

Ar ol gwneud 'chydig o ymchwil i mewn i sut mae'r blincin blog 'ma yn gweithio ('sa chi'n meddwl 'swn i 'di gwneud hynny cyn dechrau mewn gwirionedd, ond 'na fo nes i ddim darllen destructions y peiriant DVD chwaith) mae'n amlwg i mi y medra i yrru blogiadau byrfyfyr yn eithaf rhwydd trwy e-bost neu hefo fy ffon lon heb iddo darfu ar fy ngwaith dyddiol. Wedi'r cwbl rwtch llwyr 'di tua 70% o'r e-bostion 'dwi'n eu derbyn yn y gwaith beth bynnag. Gyda llaw e-bostion ydyn nhw dim e-byst, y lluosog am bostyn i ffensio neu bostyn giat ydy 'pyst'!

Felly dyna dwi am ei drio, rhyw bytiau byr yn ystod y dydd o hyn ymlaen. Ia, iawn dwi'n gwybod ma' 'na filiynau o bobl yn gwneud yr union beth yma ledled y byd bob munud o'r dydd yn barod, ond ma' rhaid i bawb weithio allan y pethau yma drostyn nhw eu hunain yn does? Wedi'r cwbl rhywbeth hollol bersonol 'di hwn i fod, a hyd yn hyn dim ond rhyw ddau berson sy' 'di darllen unrhyw beth 'dwi 'di roi yma - sy'n ei wneud o'n eithaf personol am wn i.

Diawl! Am rywun sy'n cael trafferth gwybod be' i roi ar flog dwi 'di gwneud yn reit dda o ran swmp y tro yma, 'dwn i ddim am sylwedd er hynny.

Dyna ni felly, blogiadau byr o hyn ymlaen - wel 'dwi am drio beth bynnag...

Wel dyma fi'n ol ar blaned blog o'r diwedd!
Do mae hi di bod yn siwrnai hirfaith, a llawer 'di digwydd ers i mi chwydu fy myfyrdodau yn electronig y tro diwethaf 'nol tua mis Mehefin. Ond ma'r peiriant bach yn gweithio a'r band llydan wedi ei ail gysylltu, felly dyma fi.
Dwi'n dal i fyw allan o focsys (damia dwi'n siwr i mi addo peidio son am hynny), ond ma'r bocsys bellach mewn lle newydd a finnau erbyn hyn yn un o selogion B&Q bob bore Sul er mwyn ceisio troi hofel yn gartref cysurus - tasg a fydd yn cymeryd misoedd 'swn i'n tybio. Ond 'na fo fy newis i oedd o, felly dylwn i ddim cwyno.

Ers i mi ail gysylltu'r peiriant bach, dwi 'di codi fy mhen ac edrych o gwmpas rhyw 'chydig ar y We 'ma dwi'n sownd ynddo fo, a ma' rhaid cyfaddef fy mod wedi dod ar draws ambell i beth sydd wedi fy ngwneud i grio chwerthin a hefyd crio mewn tristwch.

Dwi ddim yn un i fod yn feirniadol o genhedloedd eraill ma' rhaid cyfaddef, a dwi 'di gwario cryn dipyn o amser yn mwynhau teithio'r byd yn cymdeithasu hefo pobloedd o bob lliw a llun, ond mi ddois i ar draws y darn bach yma o fideo a gododd ofn mwyaf uffernol arna i.

Ddyweda i ddim mwy, mi gewch chi wneud eich meddyliau eich hun i fyny - siawns y bydd eich casgliadau chi yn debyg iawn i fy rhai i.

Does dim ond gobeithio mai enghraifft leiafrifol yw hon, neu waeth i ni roi'r ffidil yn y to 'rwan!

Hwyl am y tro.

Meddwl oeddwn i 'swn i'n myfyrio am rywbeth gwahanol heddiw wrth barhau ar fy antur.

Dwi ddim llawer o fardd, felly o'n i'n meddwl 'swn i'n dechrau (a gorffen ma' siwr) hefo limrig.

Ymunwch yn yr hwyl os 'da chi ffansi. Dyma'r llinell dwi am ei ddefnyddio:

Aeth bôi-mâs-o-waith o Gaerffili.

Newydd fod yn gwylio ffilm am Marco Polo (dim y boi neis 'na o Fynydd Kenfig, y llall).
Doeddwn i ddim wir yn ymwybodol o'i hanes o i ddweud y gwir, ac roeddwn yn synnu ar orchestion anhygoel y gwr yma dros 800 mlynedd yn ol a hynny heb help Thomas Cook. Yna darganfod fod y llyfr am ei deithiau mewn print ers y cyfnod, best seller myn uffar i!

Fedrwn i ddim peidio a chysidro fy anturiaethau bach i yng ngolau'r hyn a lwyddodd o i'w gyflawni yn ei fywyd. Digon di-nod mewn cymhariaeth. Prin fydd y siawns o gael cyhoeddi fy hanesion heb son am eu cael mewn print am 800 mlynedd - diolch i Dduw am flogs ... 'sgwn i fydda i yma mewn 800 mlynedd?

Does dim dwywaith 'dwi 'di i wedi cael fy siar o anturiaethau a phrofiadau o bob math, rhai 'swn i'n medru eu rhannu yn gwbl agored, rhai sy'n well dim ond yn fy nghof bach i. Stori arall 'di honno cofiwch, pan ma'r awen yn pylu efallai.

Un peth sy'n sicr, ma' croesi Java mewn tren, bws a moto beic yn pylu wrth ochr yr antur diweddara'.

Pwy ddiawl yn ei iawn bwyll sa'n symud ty dwedwch? Son am le! Ma'r ty 'ma yn edrych fel warws a dwi'n cadw'r diwydiant tap selo yn mynd ar fy mhen fy hun. Ma' prynu tocyn bws mewn Bahsa Indonesia yn bicnic i gymharu hefo'r stress o drio sortio'r prosiect yma allan. Dwi 'di son am y bocsys o'r blaen a felly does dim angen atgoffa fy hun o'r teimladau cymysg o weld fy mywyd wedi ei lapio. Ond rwan ma pethau'n desperate. Ma'r bocsys 'di gorffen a dwi lawr i fagiau bin. 'Da chi 'di sylwi faint ma' bag bin yn ei ddal? Nes 'da chi'n trio ei godi fo wrth gwrs. Sawl gwaith dwi di gorfod ail agor bag am fy mod wedi pacio rhywbeth 'dwi ei angen? Dwi'n britho'n ddyddiol.

A pwy ddiawl ddwedodd fod ffon y lon yn syniad da? 'Di'r blydi thing heb stopio canu. Yn amlach na pheidio ma gen i lond ceg o dap selo a llond dwrn o weddillion bag bin pan ma' rhywun sy'n meddwl bod nhw mewn mwy o frys na fi i nghael i symud yn galw i fy atgoffa fi o'r ffaith. 'Dwi'n gwybod hynny, dyna pam ma gen i gannoedd o focsys a rholiau o fagiau bin ym mhob man!
Os o'n i'n y felan yn gweld fy mywyd mewn bocsys, ystyriwch gweld y gweddillion bach diwerth mewn bagiau bin.

A ma' cwestiynau yn codi ynglyn a ystyr be' dwi 'di gasglu dros y blynyddoedd. Pam ma' gen i gitar? Fedra i ddim chwarae. Pam ma' gen i garreg o Ogof Twm Sion Cati? Oes 'na werth mewn hen gorn buwch? Ydw i wir angen Cyfansoddiadau a Beirniadaethau'r Eisteddfod 1938 - 1991?

Y cam nesa fydd gwneud yn siwr fy mod wedi canslo'r biliau i gyd a newid fy nghyfeiriad gyda'r holl bobl 'ma sy'n rhedeg fy mywyd i. Ma'r rhestr yn bedair tudalen erbyn hyn (ydw, dwi mor drefnus a hynny beth bynnag) a be' 'di'r bet y byddaf yn anghofio newid fy nghyfeiriad hefo'r cwmni 'na sy'n mynd i yrru siec anferth i mi am 'sgwennu blog gorau'r byd?

Dwi 'di dysgu lot fawr amdana i fy hun ar yr antur ddiweddara' 'ma, ond hyd yn hyn dwi ddim yn mwynhau'r profiad rhyw lawer. Fel llawer i brofiad wrth gwrs mi fydd gen i atgofion melus mewn blynyddoedd i ddod does dim dowt.

Rwan? Wel dwi'n meddwl y dylswn i fynd i siarad a'r boi neis na o Fynydd Kenfig!

Pam? Wel dwi 'di darganfod bod Williams Jones yn anghywir ac mai nid eu gwrthod y dylai fod wedi ei wneud.

Ond, ma' "gallai wneud yn well" yn dal i fod yn wir.

Does dim byd gwell nac oes? Chips hefo digon o halen a finag ar hen bapur newydd. A 'swn i'n dweud bod yr euogrwydd o'u bwyta yn ychwanegu at felystra'r profiad.

Wel dim mwy gyfeillion! Does dim rhaid teimlo'n euog wrth fwyta chips byth eto, 'chos hefo tipyn bach o alcohol a tamed bach o caustic soda ma' posib troi hen saim y chips yn danwydd a wnaiff weithio yn yr injan diesel 'cw a hynny heb rhoi clec i'r amgylchedd.

Yn ol pob tebyg ma' posib gwneud hyn yn y garej adref, a mae o beth diawl yn rhatach na stwff Tesco hefyd.

Gwylio 'It's not Easy Being Green' oeddwn i neithiwr, a sylweddoli bod 'na lwyth o bethau y medra i eu gwneud o gwmpas y cartref i leihau fy ol troed carbon.

Wyddoch chi, bod rhoi hanner potel Evian gwag yn nhanc eich toiled ddim jest yn arbed dwr, ond yn arbed pentwr o arian i chi os 'da chi ar y meter?

Gredwch chi bod posib cofrestru hefo'r Mailing Preference Service er mwyn stopio'r holl lythyrau diwerth gwastraffus 'na rhag glanio ar y mat?

Ma' tua Kg o bryfaid genwair (mwydod i chi a fi) wedi eu cymysgu a gweddillion y Spag Bol a'r Cyri nid yn unig yn creu compost gwych, ond yn creu gwrtaith organig lyfli ar gyfer eich rhosod hefyd!

Ma' na lwyth o bethau y gallaf eu gwneud!

Dyma lle mae'r "gallai wneud yn well" yn dod i mewn. Cyn belled ag yr oeddwn i yn y cwestiwn, yr oeddwn yn gweld fy hun fel rhywfaint o 'suburban eco-warrior'. Tom Goode y ganrif newydd! Hmmm dim ar ol gwneud y prawf. Ar ol sgorio llai na hanner marciau, "gallai wneud yn well" oedd hi.

A dyna'r sialens wrth fynd ymlaen o'r lle yma i'r lle nesa.

A dwi 'di dechrau mewn ffordd bositif iawn.

Be' oedd i swper? Wel chips wrth gwrs!

Sgersli bilifd, ond ma'r blogio 'ma yn cael cryn effaith arna i gwta wsnos ers dechrau. Dwi'n ffeindio fy mod yn talu sylw ac yn myfyrio cryn dipyn yn fwy ar be' sy'n mynd ymlaen o nghwmpas i. 'Rwan dydy 'sgwennu ddim yn dod yn naturiol i mi ma' rhaid cyfaddef, bwriad dyddiadur i mi yw fy atgoffa nad oes rhaid mynd i'r gwaith, a bwriad unrhyw fath o len oedd gwneud yn siwr fod missus drws nesa' ond un ddim yn gweld fy ngobeithion boreuol drwy'r ffenast gefn.

Yn sydyn iawn 'dwi'n dal fy hun yn myfyrio mwy ar y byd ai betws hyd yn oed wrth wagio'r sied a rhoi fy mywyd mewn bocsys cyn symud ymlaen. Yr ofn mawr ydy y byddwch yn fy ngweld ar lethrau'r mynydd hefo llyfr nodiadau yn synfyfyrio ar y cymylau cyn hir!

Dyna i chi brofiad, pacio fy mywyd mewn bocsys - dim y taflu pob dim 'na i fewn i fag bin ar ddiwedd tymor a'r golch i gyd mewn bag arall i mam ei sortio. Yn hytrach, mynd trwy pob dim, penderfynnu a oes unrhyw fwriad cadw hen lyfrau sgrap a luniais yn bedair oed a hen adroddiadau ysgol (ac oedden mi oedden nhw i gyd yn dweud "gallai fod wedi gwneud yn well"). Yna taflu'r (sori ailgylchu'r) stwff diwerth a phacio'r gweddillion yn ofalus a'i labelu er mwyn gwneud yn siwr bod trefn i fy mywyd y pen arall. Profiad 'sa'n sobri alcoholic ydy gweld ffrwyth eich bywyd mewn ambell focs. "Gallai fod wedi gwneud yn well" myn uffar i!

Rhyfedd sut ma' bocsys wedi cymryd drosodd yn fy mywyd i. Un o fy nghas ddywediadau Saesneg (un sy'n cael ei ddefnyddio yn aml yn y gwaith 'cw) ydy "Let's think outside of the box". Be' ddiawl sy'n bod hefo jest bod yn greadigol? Ond 'na fo, fel 'na mae.

Wel mi wnes i ddechrau meddwl 'outside of the box' am yr hyn a 'sgwennais ddoe. Ma' pawb yn dweud y dyliwn i fod yn poeni am yr hen blaned 'ma, ac yn wir bod yn hapus talu er mwyn ei arbed. Wel chwara' teg, ma bylbiau'r ty 'ma i gyd o'r math spesial 'na sy' ddim yn lladd y blaned, dwi'n ailgylchu yn selog, yn talu ffortiwn am betrol ac yn teimlo'n euog bob tro dwi'n defnyddio'r car i fynd i'r gwaith. Dwi'n troi'r cyfrifiadur i ffwrdd bob nos ac yn troi'r anghenfil un llygeidiog i ffwrdd yn y wal. Dwi hyd yn oed 'di bod yn cysidro prynu coed bob tro y byddaf yn mynd ar wyliau dramor (dim hefo Thomas Cook cofiwch!).

Ond ma'r bocs 'ma wedi gwneud i fi feddwl 'chydig am sut y medra i wneud tipyn mwy, 'chos ma' na bethau yn fy nhy i sy'n defnyddio llawer iawn mwy o danwydd nag ydw i yn ei wneud fyth.

Wyddoch chi fod gen i domatos o wlad Pwyl yn fy oergell, cig moch o Ddenmark, cyw iar o'r Iseldiroedd, orennau o Israel, byrgars o'r Iwerddon a menyn o Duw a wyr lle? Faint o blincin danwydd mae o 'di gymeryd i ddod a'r pethau yma i'r ty 'sgwn i? Welais i 'rioed domato mewn ty gwydr yng Ngymru, na mochyn mewn twlc, ieir ar y buarth na buwch mewn cae! 'Drychwch chi, dwi'n siwr fod eich oergell chithau wedi teithio miloedd ar filoedd o filltiroedd hefyd.

Ar ben hyn i gyd ma bob dim yn dod mewn blydi bocs o rhyw fath!!

Gwrando oeddwn i ar y Post P'nawn ar fy mhen fy hun yn y car ar y ffordd adref a chlywed tair stori a wnaeth i'r tagiad traffig basio yn eithaf di boen.

Yn gyntaf clywed fod yr hen Jane yn ceisio cael grym i ddeddfu er mwyn gwarchod ein hamgylchedd yn fwy effeithiol a'n cael i ailgylchu mwy - sa hi'n gweld faint o ail gylchu dwi 'di bod yn gwneud wrth wagio'r ty!

Meddwl oeddwn i Jane, tra'r oeddwn yn eistedd yn y car 'llu 'de, y byddai'n well pe ba Gweinidogion Llywodraeth Cymru yn dangos arfer dda a chael gwared ar eu 'gas guzzlers' swyddogol yn gyntaf, cyn trio cael y werin datws i ailgylchu a dal y tren. Onid trwy esiampl ma' arwain?

Clywed wedyn bod caniatad cynllunio wedi ei basio i adeiladu fferm wynt anferth ar Fynydd Betws - sy'n mynd i arbed ein byd bach ni ond lladd yr adar man.

Ar yr un gwynt (sori!), disgrifiad o 'restio protestwyr ger Aberhonddu sy'n protestio yn erbyn y bibell nwy sy'n rhwygo ar draws cefn gwlad Cymru - pibell sy'n cario nwy sy'n mynd i ychwanegu at ein problemau amgylcheddol.

A hyn i gyd ar ol p'nawn lle yr oeddwn wedi bod yn chwysu peintiau yn y gwres tra roedd y glaw yn pistillio i lawr!

Fe wnaeth hyn i gyd i mi sylweddoli fy mod mewn twll braidd.

Dwi'n un o'r bobl 'ma sy' wedi darllen The Revenge of Gaia gan James Lovelock. Llyfr arswydus os 'da chi'n derbyn ei safbwynt o. Llyfr arswydus beth bynnag eich safbwynt efallai.

Mae un ddadl gan Lovelock yn cymeradwyo y defnydd o ynni niwcliar fel yr unig ateb sy' ar ol. Dadl sy'n fy nychryn ond dadl gref er hynny - a dyna ydy'r twll dwi ynddo fo.

Ydw i yn erbyn neu o blaid Ynni Niwcliar?

Ar hyn o bryd, Duw a wyr. Cawn weld.

Dwi 'di bod braidd yn esgeulus y pen wsnos yma gan nad ydw i wedi blogio.

Y rheswm pennaf am hynny oedd fod pethau llawer iawn pwysicach gen i i'w gwneud na eistedd o flaen yr anghenfil yn teipio.
Does neb yn darllen y lol 'ma beth bynnag felly ma' rhaid cyfaddef nad oeddwn yn teimlo'n rhy euog, er fy mod wedi gorfod dod i chwilio am y catharsis yn y diwedd!

Profiad newydd i mi ydy chwydu myfyrdodau fel hyn ac felly fe gurodd potel neu ddwy o win coch y chwant y penwythnos yma, ynghyd a phrofiad digon tebyg i rai Pethau Bach yn yr atig, er mai gwagio dim chwilio yr oeddwn a doedd dim yno ar gyfer yr Antiques Roadshow os nad ydy llwyth o focsys cyfrifiadurol yn antiques erbyn hyn.

Syndod ydy o i mi fod cymaint o bobl wrthi ym mhob man ar draws y byd (blogio dwi'n feddwl!).

Ma'r glweidyddion 'ma i weld yn gwario hanner eu hamser yn blogio. Hmm dim byd gwell i'w wneud, yntai dyma sut ma cyfathrebu hefo'r bobl y dyddiau yma? Wel dwi'n gwybod be' ma nhw'n ei wneud yn ystod y Cyfarfodydd Llawn yn y Bae tra ma' Rhodri'n mwydro ar b'nawn Mawrth rwan beth bynnag.

Eniwe, ma gen i bethau gwell i'w wneud felly ffwrdd a fi.

Dyma ateb a ges i ebost a yrrais at Thomas Cook yn datgan siomedigaeth tuag at eu polisi iaith:

Your observations on a recent press statement from Thomas Cook are appreciated, and I am genuinely sorry that you are unhappy.

Thomas Cook asks its staff to speak English when discussing work related matters to ensure that those employees who do not speak another language are included in such conversations.

Thomas Cook employs staff from many cultural backgrounds and, therefore, appreciates staff may wish to have conversations with each other in another language.

We will be discussing this further with the Commission for Racial Equality and the Welsh Language Board in order to develop our policy on other languages in the workplace. The two statutory bodies have welcomed our decision to discuss how we develop best practice in this area.

Thomas Cook value the skills and contributions of all its staff, including their language abilities and we look forward to discussing with the Commission of Racial Equality and the Welsh Language Board how we can combine that with effective management of a complex working environment.

We would wish to assure you that it was never our intention to stop our staff speaking Welsh in the workplace.

We hope the above gives you assurance that we are taking this matter seriously.

Yours Sincerely
Danielle Hartley
Thomas Cook Customer Relations

Hmmm 'dwi'm yn meddwl y byddan nhw'n cael fy musnes i ar frys!
Be' 'da chi'n feddwl?

Wel mae'n amlwg o'r diwrnod dwi newydd ei gael fy mod yn y busnes anghywir (ond i fod yn onest ma siwr fy mod yn sylweddoli hynny erbyn hyn).
Bu heddiw yn binacl o gyfnod o chwilio ac o regfeydd ar fy rhan i.

Pam? Wel dwi 'di bod allan yna yn chwilio am forgais newydd wrth symud ty.

Buan iawn nes i sylweddoli nad oedd gen i ddim llawer o glem ynglyn a be sy' di bod yn mynd ymlaen yn y byd ariannol ers i mi sortio morgais y tro diwethaf.

Yn fy niniweidrwydd roeddwn i'n meddwl y buaswn i yn medru cael morgais gan gwmni a wedyn talu am 'y fraint' yma trwy dalu llog am yr hyn yr oeddwn wedi ei fenthyg. Braf 'sa peidio gorfod talu o gwbwl ond dyna ni, rhaid ei dderbyn, ond yn sydyn mi wnes i sylweddoli fod yn rhaid i mi dalu ddwywaith.

Nid yn unig fod yn rhaid i mi dalu llog am fenthyg arian, roedd yn rhaid i mi dalu ffi i'r benthycwr am y fraint o ddefnyddio eu gwasanaeth!

Talu am yr hawl i gael talu am fenthyciad!

Be' wnes i?
Wel talu wrth gwrs, fel miliynau o bobl ac wrth wneud hynny yr oeddwn yn gwybod mai dim ond cadw'r sefyllfa gwarthus yma i fynd yr ydw i yn ei wneud.

Mi ddylwn i gysidro fy hun yn ffodus fy mod yn medru fforddio ty a morgais y dyddiau yma maen siwr, ond rhaid cyfaddef 'di hynny ddim yn gwneud y bilsen yn llawer haws ei llyncu!

A dyna fi 'di gwneud digon o gwyno am heddiw. Hwyl.

Wel dyma ydy anhygoel, y fi yn medru mwydro... sori myfyrio o fy
mobile! Handi ar y d gan ei fod yn edrych fel y byddaf yma fy hun tu
draw i'r enfys yn ôl jungle drums y Bae... O wel does unman yn debyg i
adref nac oes?

"Hen bryd i fi ddechrau" meddyliais i.
"Dechrau be?" Meddech chi.
Wel y blincin blogio ma 'de! Felly dyma fi wrthi. S'gen i ddim syniad be ddaw o'r hen ben gwag 'ma, ond mi wna i drio fy ngorau i gadw fy mhaldaruo ddiwedd nos yn fyr (rhaid i foi gysgu on'd oes?) a hefyd yn ddidorol (gobeithio). Ma' un peth yn sicr fydd fy myd bach i ddim yn troi o gwmpas Thomas Cook o hyn ymlaen, 'chos mae hi'n eitha sicr nad ydyn nhw yn malio dim un botwm corn amdana i a phobl tebyg i mi sydd am gadw'r hawl i fyw eu bywydau gwaith trwy gyfrwng eu hiaith ddewisol.
Os 'da chi'n cytuno, ymunwch a mi a miloedd eraill wrth leisio barn a cloi eu 'servers' nhw i fyny'n llwyr trwy eu e-bostio ar:
customer.relations@thomascook.com
A dyna fi 'di cael fy nweud am heno, nos da!